കൃത്യനിർവഹണത്തിനിടെ ഒൻ്റാരിയോയിൽ ഇന്ത്യൻ വംശജനായ പോലീസ് ഉദ്യോഗസ്ഥൻ കൊല്ലപ്പെട്ടു

 

കാനഡയിലെ ഒൻ്റാരിയോയിൽ ഡ്യൂട്ടിക്കിടെയുണ്ടായ അപകടത്തിൽ ഒൻ്റാരിയോ പ്രൊവിൻഷ്യൽ പോലീസ് ഉദ്യോഗസ്ഥനായ കോൺസ്റ്റബിൾ തരുൺ ബാലി (29) കൊല്ലപ്പെട്ടു. ബ്രാംപ്ടൺ സ്വദേശിയായ ഇദ്ദേഹം കഴിഞ്ഞ മൂന്ന് വർഷമായി പോലീസ് സേനയുടെ ഭാഗമായിരുന്നു. സംഭവവുമായി ബന്ധപ്പെട്ട് ഒരാളെ പോലീസ് അറസ്റ്റ് ചെയ്തിട്ടുണ്ട്.

ചൊവ്വാഴ്ച ഉച്ചയ്ക്ക് 12:30-ഓടെ വടക്കൻ ഒൻ്റാരിയോയിലെ ഹേർസ്റ്റിന് സമീപമുള്ള കെൻഡൽ കൺസെഷൻ റോഡിൽ ഒരു കേസ് അന്വേഷിക്കുന്നതിനിടയിലാണ് തരുണിന് ഗുരുതരമായി പരിക്കേറ്റത്. ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മാനസികാസ്വാസ്ഥ്യം പ്രകടിപ്പിച്ച ഒരു ഡ്രൈവറെ തടയുന്നതിനായി റോഡിൽ 'സ്പൈക്ക് ബെൽറ്റ്' (ടയർ പഞ്ചറാക്കുന്ന ഉപകരണം) സ്ഥാപിക്കുന്നതിനിടയിലാണ് അപകടമുണ്ടായതെന്നാണ് പ്രാഥമിക വിവരം.

ആദ്യം ഡഫറിൻ ഡിവിഷനിൽ ജോലി ചെയ്തിരുന്ന തരുൺ, പിന്നീട് ഏറെ അകലെയുള്ള ജെയിംസ് ബേ യൂണിറ്റിലേക്ക് സ്വയം സന്നദ്ധനായാണ് സ്ഥലം മാറിപ്പോയത്. മികച്ച പ്രൊഫഷണലിസത്തോടൊപ്പം കാരുണ്യപ്രവർത്തനങ്ങളിലും അദ്ദേഹം സജീവമായിരുന്നു. ക്രിസ്മസ് കാലങ്ങളിൽ കുട്ടികൾക്കായി സമ്മാനങ്ങൾ ശേഖരിക്കുന്ന പരിപാടികളിൽ അദ്ദേഹം സജീവമായി പങ്കെടുത്തിരുന്നു. ജനങ്ങളെ സഹായിക്കാൻ എപ്പോഴും മുന്നിൽ നിന്നിരുന്ന, ആത്മാർത്ഥതയുള്ളൊരു ഉദ്യോഗസ്ഥനായിരുന്നു തരുൺ എന്ന് സഹപ്രവർത്തകർ അനുസ്മരിച്ചു.

തരുൺ ബാലിയുടെ വിയോഗം സേനയ്ക്ക് നികത്താനാവാത്ത നഷ്ടമാണെന്ന് ഒപിപി കമ്മീഷണർ തോമസ് കാരിക് പറഞ്ഞു. ഒൻ്റാരിയോ പ്രീമിയർ ഡഗ് ഫോർഡ് ഉൾപ്പെടെയുള്ള പ്രമുഖർ തരുണിൻ്റെ ധീരതയെ അനുസ്മരിക്കുകയും കുടുംബത്തിൻ്റെ ദുഃഖത്തിൽ പങ്കുചേരുകയും ചെയ്തു. 2026-ൽ ഡ്യൂട്ടിക്കിടെ കൊല്ലപ്പെടുന്ന രണ്ടാമത്തെ ഒപിപി ഉദ്യോഗസ്ഥനാണ് തരുൺ ബാലി. നിലവിൽ ഒപിപിയുടെ ക്രിമിനൽ ഇൻവെസ്റ്റിഗേഷൻ ബ്രാഞ്ചും ചീഫ് കോറോണർ ഓഫീസും ചേർന്നാണ് സംഭവത്തെക്കുറിച്ച് അന്വേഷിക്കുന്നത്.